|
Dr Vadder vom Fahrlehrer Botschemberle aus
Unterheckabeerleshause, net so weit vo Stuagart, war au scho Fahrlehrer.
D’ Leit hen gsagt, er sei a reachter Kommiskopf gwä. Koi wonder, sei
Fahrlehrerschei, so hoißts, häb er, wenn mr dem Grücht glaube derf,
seinerzeit uff re Rollbahn in Russland gmacht. Wenn no a mol an
Fahrschüler beim Rückwärtsfahre stocksteif do ghockt isch ond glaubt hot,
s tät roiche, en de innere Rückspiegel zu glotze, no hot en der alte
Botschemberle mit em a schnarrende „Arsch zur Tür“ so verschreckt, dass er
des nie me vergesse hot. Dr jong Botschemberle hat vo seim Alte seine
Methode net so viel ghalte. Wenn sich bei ehm an Fahrschüler beim
Rückwärtsfahre net omdreht, no verzehlt er ällemol zerscht dui Gschicht vo
seim Vadder selig und sagt, „aber i sag do bloß ganz leis ATÜ, wenn sie
sich net umdrehet“. Als no amol em Hochsommer so a jonge Denge mit
Spaghettiträgerle zur praktische Briefung komme isch ond beim
Rückwärtsfahre net ATÜ gmacht hot, hot se der Botschemberle groß aguggt
und lautlos mit seine Lippe des ATÜ artikuliert. Als se endlich gspannt
ghet hot, was er moint, hot se sich vor Schreck ruckartig omdreht, wobei
ihr links Brischtle blutt aus em Bliesle ghopft isch. Dui hot’s selber gar
net gmerkt ond hot monder vollends eiparkt. Der Botschemberle hot verlega
auf d Seite guggt ond nix gsagt. Wahrscheinlich wär se so au weiter gfahre.
Aber no hot der Briefer d Initiative ergriffe, zum rechta Seitefenster
naus guggt ond ganz beiläufig gsagt: „Sie hen prima eiparkt, abber jetzt
sottet Sie amol im Rückspiegel gucke, wie Sie des agstrengt hot.“
Bis bald
Euer Marie Sälzle |
