 Dr Fahrlehrer
Botschemberle aus Unterheckabeerleshause, net so weit vo Stuagart,
hot olängst an Jordanier ausbildet. Dr Hammudeh, so hoißt er, „ isch
a prima Kerle, ka scho guat schwäbisch und schdrengd sich mordsmäßig
a“, sait der Botschemberle. Bloß, wenn’r auf’r broitere Stroß fehrt,
will des mit dem Rächds vor Lenks oms Verrecka net in sein Loggekopf
nei. No zwoi Täg vor dr Briefung het er desswega an Ohfall baut, wär
dr Botschemberle net voll in d Eisa gstiege. Wo no dr Botschemberle
a bissle bruddelt und zu nem gsait hot, „Hammudeh, so leichtsennig
kannsch net amol bei eich in dr Wüste romfahre“, hot en dr Hammudeh
mit seine große braune Auge ohgleibig ahguggt ond gsait: „Machet se
sich do koine Sorge, Herr Botschemberle, i bleib do!“Bis bald –
Euer Marie Sälzle |
